લશ્‍કરી દળોમાં જોડાવાથી મળતા પગાર, ભથ્‍થાં અને બીજી સગવડો ઉપરાંત દેશ માટે કંઇક કરી છૂટવાની જે તક મળે છે તે વધુ મહત્‍વની છે. ભારતીય નૌકાદળમાં જોડાવાની ત્રણ અલગ અલગ પ્રકારની - સ્‍વરૂપની તકો આપની પાસે છે. આપણા નૌકાદળમાં નાવિકાનું સ્‍થાન મહત્‍વનું છે. આપણા નૌકાદળની મશીનરી, શસ્‍ત્રો, વીજાણું ‘સેન્‍સર્સ’ અને જહાજ પરનાં સાધનોને કાર્યાન્‍વિત કરવાની અને યોગ્‍ય રીતે જાળવણી રાખવાનું કાર્ય નાવિકો દ્વારા થાય છે. આ નાવિકને નૌકાદળ દ્વારા જ તાલીમ આપવામાં આવે છે. શરૂઆતની પાયાની તાલીમ INS ચિલ્‍કા, જિલ્‍લો ખુર્દા, ઓરિસ્‍સા ખાતે આપવામાં આવે છે. ત્‍યાર બાદ આગળની તાલીમ દેશભરમાં આવેલા વિવિધ નૌકાદળ મથકો ખાતે આપવામાં આવે છે. ગુજરાતમાં જામનગર ખાતે INS વાલસુરા નામે આ પ્રકારનું કેન્‍દ્ર છે. જરૂર પડયે પસંદગીના નાવિકોને તાલીમાર્થે વિદેશ પણ મોકલવામાં આવે છે. વળી, નાવિકોને નૌકાદળમાંથી છૂટા કરતાં પહેલા તેમને ‘પ્રિ-રિલીઝ’ અભ્‍યાસક્રમો દ્વારા નાગરિક જીવનમાં ગોઠવાઇ શકાય તેની તાલીમ પણ આપવામાં આવે છે. તો મિત્રો, નાવિક તરીકે જોડાવા તૈયાર છો ને ?